《我的配音日記》第三堂，捉懶音 & 配英文卡通片

新一年，配音班來到第三堂了，又來到了熟悉的錄音室:)
暫時同學仔都好人齊，冇人缺課，之前學過其他興趣班，通常去到第三四堂就會開始越來越少人。哈哈，證明我地真係好有熱誠。

一開始就溫故知新，重點上堂講過咩，然後就聽Playback，原來上一堂錄麥太時太過著重時間準唔準同對白啱唔啱，忽略了最重要的語氣同感情，變得格格不入。急口令果個位就唔識搵位抖氣，讀到最尾幾粒字der左落去。呢個是我的弱點，肺活量唔夠，又唔識搵位抖氣，唱歌都係唔夠氣的。

4個發聲位置：天靈、鼻音、喉嚨音、胸腔，同埋點運用丹田呼吸。
然後我地就開始做功課，每人輪流讀「繞口捉懶音令」，再輪流聽Playback，阿Sir逐一捉我地d懶音。

今堂錄音係幫英文卡通片配音，聽原聲後再錄返廣東話對白，難度越來越高。