Travel Mama Day 遊媽地: 馬爾代夫親子遊 Gili Lankanfushi @Day2.1

Gili Lankanfushi 馬爾代夫親子遊記 Day2.1 // 喜出望外的貼心服務

上回講到酒店職員在Male機場接我地坐快艇，只係20分鐘我地就由馬爾代夫首都Male來到Gili Lankanfushi Resort，個名有點長，我簡稱Gili吧。

望到一片湛藍李施德林海水，Hello，我又返嚟這片熟悉又親切的土地喇。

到步後因為房間未準備好，所以職員帶我地往Overwater Bar餐廳先午膳，食飽飽再check-in。

天氣好好，沿途的風景好美

Overwater Bar是半露天餐廳，餐廳好開揚，每一個角落都能望到馬爾代夫的怡人景致，海水很清澈，我們還周不時見到魔鬼魚游過。最興奮的莫過於我的1歲兒子吧，佢對每樣嘢都非常好奇，刀刀叉叉都拿來玩，剛學懂步行的他還不時爬上爬落，幸好餐廳沒有太多人，而且有很大片空間讓佢周圍走來走去，酒店的管家都好好陪佢玩，幫我們暫時照顧一陣，等遊媽遊爸有餐安樂茶飯。

我們點了Pizza、羊架、串燒和湯 (忘記了是甚麼湯)，食物都很新鮮好好味呀，冇諗過都幾大份，我們吃到好飽。

餐具設計很有心思

過了兩個鐘之後，間房已經ready俾我地check-in，一入到去第一個感覺就係「嘩！好大呀！」我地住最普通的Villa Suite都有二千幾呎，每間Villa都會分配一位管家Mr. Friday，你在旅程中有任何需要都可以搵佢幫手，例如：訂餐廳、訂Spa、訂活動，或者你諗得到嘅問題，都可以搵佢幫你手。Mr. Friday還會兼任埋司機呢~

在Villa外停低，我們就Check-in喇~~~

我地間Villa，好～大～啊～

我地住Villa 23

第一次住呢d原木設計的Villa，感覺好新鮮，同埋好舒服，同馬爾代夫嘅天然環境好Match。

Gili Lankanfushi — Villa Suite 房間介紹

我拍左條Villa介紹，去片！

走了Villa一圈，一入大門便是勁開揚的客廳，左手邊是睡房，客廳對出是陽臺，有網床同沙灘椅，還有樓梯可直接落海。

大廳的右手邊進去是洗手間和浴室，好寬敞啊！(旅途中手提電話冇容量，d相在相機內，遲d後補返)

浴室有浴缸和半室外花灑浴，浴室還有另一條樓梯落海，方便游完水直接返上嚟沖身，好貼心呀。

浴室內有透明玻璃底地板

這間Resort只有四十幾間Villa，屬於小型酒店，客人和員工的比例相約，酒店服務是超水準，出發前酒店已經send了一份表格向我們詢問有冇特別需要，例如香薰味道，Bathroom amenities，要唔要較剪、洗衣粉等等，細心到一個點，我地只係填左有小朋友，其他都冇填喇。點知去到，酒店準備左BB床，仲有BB沐浴露、潤膚露、連尿片、BB沖涼盤、暖奶器同奶瓶消毒器都有，真係令我非常Surprise！佢地仲幫我地在大廳中加左個木圍欄，防止BB唔小心衝出露台跌落海。