《我的配音日記》第三堂，捉懶音 & 配英文卡通片

新一年，配音班來到第三堂了，又來到了熟悉的錄音室:)
暫時同學仔都好人齊，冇人缺課，之前學過其他興趣班，通常去到第三四堂就會開始越來越少人。哈哈，證明我地真係好有熱誠。

一開始就溫故知新，重點上堂講過咩，然後就聽Playback，原來上一堂錄麥太時太過著重時間準唔準同對白啱唔啱，忽略了最重要的語氣同感情，變得格格不入。急口令果個位就唔識搵位抖氣，讀到最尾幾粒字der左落去。呢個是我的弱點，肺活量唔夠，又唔識搵位抖氣，唱歌都係唔夠氣的。

4個發聲位置：天靈、鼻音、喉嚨音、胸腔，同埋點運用丹田呼吸。
然後我地就開始做功課，每人輪流讀「繞口捉懶音令」，再輪流聽Playback，阿Sir逐一捉我地d懶音。

今堂錄音係幫英文卡通片配音，聽原聲後再錄返廣東話對白，難度越來越高。

《我的育兒日記》戒甩電子奶咀

這兩星期成功幫弘弘戒甩電子奶咀，平時愛看電視的我們都恨心地關掉電視，收埋遙控器。初初弘弘是很不習慣，有時扭睇電視好似毒癮發作咁，瞓地嚎哭，我地堅決唔心軟，喊完一輪佢就會收聲。慢慢習慣左沒有電視的日子，佢就冇再扭電視。

我們要營造一個良好學習環境俾佢，除了關掉電視，我地仲去書局買左d幼兒益智拼圖、生字書俾佢睇，佢好鍾意啊！特別係拼圖，好耐玩。

最近還學識左講「鼻鼻」、「眼眼」、「咀咀」，英文生字都識多左：「A」、「B」、「D」、「I」、「M」、「O」、「P」，係好開始呀！我地會繼續努力，希望可以追得返。

遊媽同遊爸都係唔主張催谷的，不求聰明絕頂，但願能平穩發展已足夠。

好開心，今朝健康院姑娘打嚟可以約早d做語言評估，本身約左7月中，而家最快可以約2月中。

帶工人姐姐去日本旅行，如何辦理簽證？

帶工人姐姐去旅行，在香港越來越普遍，特別係Big Family Trip，想去旅行又未必夾到工人姐姐放假，唯有帶埋佢一齊去啦，多雙手多個照應嘛。

聽過有人帶埋工人姐姐去日本旅行，去到機場先發現工人姐姐要簽證……被迫折返😱。原來好多人都唔知工人姐姐去日本要簽證。

馬爾代夫親子遊 Gili Lankanfushi @Day2.3

Gili Lankanfushi 馬爾代夫親子遊記 Day2.3 // 有趣的Wine Tour, 印度之夜晚餐

有趣的Wine Tour

下午我地參加了酒店為我們而設的特別活動Wine Tour，品嚐來自世界不同地方的美酒及美食。第一站是日本餐廳 By The Sea：日本清酒配合日式小食。廚師為我講解Sake的歷史及分別，呷一口清酒，吃一啖吞拿魚他他，簡直係人間美味。因為老公唔係好飲酒同食生野，我幫佢清晒碟小食，哈哈。

馬爾代夫親子遊Gili Lankanfushi @Day2.2

Gili Lankanfushi 馬爾代夫親子遊記 Day2.2 // 考察總統套房 & 婚禮小教堂

安頓好之後，我們就要去考察酒店了。因為遊媽是在旅行社工作，所以此行是「半公半私」遊，主要目的當然是玩啦，但玩的期間也要工作一點點。我們到碼頭坐船仔出去，參觀酒店的總統套房The Private Reserve！

呢間Villa位於主島以外的500米海中心，一萬七千幾呎，有４間房，可以住8–10人，私隱度極高唔在講，裡面勁勁勁大。有健身室、Spa Room、私人影院、酒窖、工作房、游泳池及滑梯等設施。參觀當日天氣唔係太好，仲落雨，所以我夾雜了幾張官網照片。

馬爾代夫親子遊 Gili Lankanfushi @Day2.1

Gili Lankanfushi 馬爾代夫親子遊記 Day2.1 // 喜出望外的貼心服務

上回講到酒店職員在Male機場接我地坐快艇，只係20分鐘我地就由馬爾代夫首都Male來到Gili Lankanfushi Resort，個名有點長，我簡稱Gili吧。

望到一片湛藍李施德林海水，Hello，我又返嚟這片熟悉又親切的土地喇。

馬爾代夫親子遊 Gili Lankanfushi @Day1

Gili Lankanfushi 馬爾代夫親子遊記 Day1 // 在斯里蘭卡轉機

自從做左媽媽之後，已經Ｎ年冇寫過遊記。很榮幸年頭可以再次遊覽馬爾代夫，今次帶埋１歲仔仔一齊去，好大挑戰XD

去年8月買左斯里蘭卡航空做推廣的來回機票，但航班一改再改，回程由原本只係等幾個鐘，變成等12個鐘，計埋坐飛機嘅時間足足遲左一日先返，要在機場酒店吽12粒鐘，想改機票又要罰幾千蚊，最後決定no show左回程張機票，用里數redeem左單程國泰直航返嚟就算。

斯里蘭卡航空又唔係想像中咁差，由香港飛往可倫坡，架飛機好新淨，係皮座椅 (在機上忙著照顧孩子，所以影唔到相喇)。我地係搭夜機到，在斯里蘭卡機場中轉酒店住左一晚，第二朝才坐早機到馬爾代夫。之前聽人講，機場間酒店Serenediva Colombo Transit好不堪，出發前已有晒心理準備，沒有期望，沒有失望，還有點驚喜呢。我們被安排入住最近Reception的房間，唔知係咪我地有小朋友關係，間房都幾大，算乾淨企理，以中轉酒店嚟講已經合格了。

關於Medium文章搬家

未開Blogspot前，我在Medium寫了一些文章，雖然唔係好多，為了想整理好一點，遲d會將那邊的文章分段遷移過來。或者遊記會主力喺度寫，Medium那邊間唔中都會寫d限定文章。

當初開Facebook，開Medium，開Wordpress，都冇諗咁多，想開就開，想寫就寫，但是要好好管理又是另一個學問。自己是急性子的人，一決定左要做一件事就好想用最短時間完成，但是已經停了幾年的東西幾個月做返晒，未免有點痴心妄想吧，欲速則不達，之前個Blog都經營左三五七年先慢慢成形啦，成功沒有捷徑，只有一個方法，就是全心全意，默默耕耘，努力同堅持。

//有些事情，的確有捷徑可走，比如餐廳爆滿的時候，別人在等位，你眼尖看到一個空位就坐了。這是小聰明，小聰明用在小事上。但凡關係到事業、家庭的大事，想走捷徑的，往往走了彎路，繞一圈回來，還得老老實實地以毅力加持天分，用堅持延續好運。// <---原文

哈哈，廢up完畢，還是少說話，多做事吧。

《我的配音日記》第二堂

第二堂配音班，今堂一開始就聽返上堂的Playback，錄嘅時候掛住錄，都唔係好記得自己錄成點。重新聽一次就知道邊d位做得唔好，阿Sir都逐個逐個再俾一次意見。

跟住就係交功課，上一堂阿Sir叫我地觀察身邊一個人，紀低佢嘅年紀、職業、外形、性格、聲線、說話語氣......等等，然後俾一句對白你，模仿呢個人講返出嚟。呢個過程好有趣，同演戲好相似，唔係就咁講咁簡單，要傳神就要「帶戲入場」，手勢語氣眼神加表情，「由內到外再到返內」，有感情地演繹出嚟。

然後就講下行業陷阱、行業前景，又有好多故事聽。
到最後，又到我地表演時間，每次上堂都會有機會實習，第一堂係配反應，第二堂係配對白，終於有對白喇！今次係演麥兜電影嘅一段情節😂
我地一男一女扮演麥太同醫生，好經典嘅一段。臨尾果句：「仲有小兒驚風外感發冷無名腫毒外傷骨節腸胃不適疴嘔肚痛四時感冒腰酸背痛 小便不暢脂肪積聚性慾減退大頸泡大眼肚咁囉！」成段急口令，要一口氣讀晒出嚟，係超難架，我地讀到笑料百出，成班哈哈大笑。

下堂難度再高d，考懶音，阿Sir派左張Notes俾我地準備，望左一眼，d字好繞口呀，類似「一蚊一隻龜 七蚊一隻雞 佢話龜貴過雞 我話雞貴過龜 咁究竟龜貴過雞定係雞貴過龜」嘅朋友。我返屋企試讀一次，有d甩cut，再讀第二次就好d喇，要好好練習下先得！

《我的育兒日記》2歲小孩語言發展評估

眨下眼，仔仔已經2歲大，剛剛去了健康院見姑娘做了語言發展評估，同預期一樣，比同齡的小朋友發展遲緩了很多，要約見醫生做一個詳細的語言發展評估。其實1歲半的時候，已經發現遲緩了少少，但是我一直同自己講：男仔係慢d嘅，正常嘅，老公細個時候都係好遲先識講嘢，應該係遺傳。

然而，到了2歲，詞彙上好像都是沒有甚麼進展。而家仔仔識講的字有：「爸爸」、「奶奶」、「車車」、「8」、「A」、「曳曳」、「快d啦」、「唔識」、「姐姐」，「媽媽」這個音是發到的，但是暫時都未有意識地叫我，好耐之前開始就是見任何人都嗌「爸爸」，最認得就係爸爸，平時見得最多嘅爺爺嫲嫲都係唔係好識叫。

內心一直都好掙扎，應該辭去工作全職照顧仔仔，還是繼續努力工作，俾好d嘅生活佢？撇除經濟上嘅考慮，唔洗諗，一定係前者！由陀BB果日開始，已經知道孩子0-3歲是最黃金的陪伴期，最需要父母陪伴的階段，錯過了就追唔返。自從10週產假完畢後，我就重返職場，一直過著與孩子分離的日子。因為住得唔近，所以仔仔長期住在老爺奶奶屋企，星期五六日我地才接返佢返嚟湊，時間過得好快，不知不覺就兩年。

湊小朋友是一件苦差，我們放假湊一兩日都攰到不得了，更何況老人家？好感激老爺奶奶願意犧牲體力時間來湊孫，特別係奶奶，佢係超強的，又要買餸煮飯照顧老爺，又要湊孫，有時見佢因為湊孫搞到腰酸背痛，我都會好內疚。

我同自己講，要努力搵多d錢，然後Take個Break，接仔仔返嚟一齊住，等佢大個再出返嚟做嘢。但一年過去，兩年過去，仍然未實現到。朋友send左呢篇文章俾我，睇完好感觸...「所謂成功，就是這 6 年好好陪自己的孩子...時機一過 老了只剩「後悔」 陪你！」，我心裡面十萬個唔想>_<

唔得！唔可以！我一定要諗辦法，同埋要下決定，改變現狀！

《我的配音日記》第一堂

尋晚上左第一堂配音班，全班有13人，廿幾歲到四五十歲都有，大家都因著興趣和緣份而聚首一堂。

天生哥真係一個德高望重，經驗非常豐富的前輩，做過台前幕後許多不同崗位，聽佢分享由做o靚仔入行嘅經過，點解會由幕前轉做幕後，點解會由配音變成領班，到教班，當中有好多好多故事，我好鍾意聽人講故仔，佢生動嘅演繹講得特別動聽。

除左講故仔，佢仲分享好多經驗之談，唔單止教我地配音的技巧，仲有職業操守、道德修養，在言談間不停塞錢入你袋，好榮幸可以跟佢學嘢，獲益良多。

第一堂，估唔到我地已經有得玩配音😍
同學仔分開9組人，輪流為一段卡通情節配音，兩個角色幾乎沒有對白，要透過動作、眼神、嘴巴大小，來為他們配上聲音。好好玩，我還因為太投入角色而不自覺腳底揼左地幾下😅有同學仔好勁，第一次配已經好專業，幫角色注入靈魂，令人睇得好投入肉緊。其實真係幾難的，要「眼明口快」，時間節奏感情要掌握得好好，錯少少都要由頭嚟過。

快樂嘅時光過得特別快，兩個半鐘眨下眼就過，臨走前我地仲影左大合照留念❤期待快d上下一堂^^

《我的配音日記》上堂前的興奮心情

《我的配音日記》
好興奮呀，今日就上配音班第一堂😍
好想好好記錄低呢個旅程

識我嘅朋友都知，我細細個嘅夢想係做配音員，偶像係鄭麗麗姐姐
小學嘅時候曾經寫過信俾佢，仲收到她的回信，好開心
我記得當時問佢:「點樣可以成為一個配音員?」
佢話本身唔係做配音的，機緣巧合下入左行，仲叫我俾心機讀書，大個左再諗做咩啦

2004年，TVB舉辦第三期配音員訓練班，當時我仲係一名學生
千載難逢嘅機會，填晒報名表同埋錄左Demo，但係最後都冇寄到
因為萬一入選訓練班，需要為期3個月的全職訓練，畢業後有機會成為TVB的配音員
但當時只係剛入學，仲有幾年要讀，如果真係入選左，我都唔會放棄讀書走去做全職配音員，所以考慮清楚後就沒有報名

畢業後就出來社會工作，配音這個小夢想就擱置了
直到前陣子在ViuTV見到龍天生前輩和他的門生黎皓宜一個關於配音員的訪問，看得津津有味，於是上網search下龍老師有冇開班，真係有，時間Match到，Perfect!!! 跟住第二日就立即Whatsapp報名。好開心好開心好開心!!! 可以跟到有豐富經驗的老行尊學嘢，一圓小時候的夢想。今晚就上第一堂，好期待...^^

第一篇自我介紹

大家好，我係 AABB Happy Travel。遊世界 的原作者B小姐

「我若不在家，就在旅行的路上......
典型Budget Traveller，夢想是環遊世界，在香港「工作．假期」，前後做過動畫師、酒店、飲食、旅遊、婚禮等工作，認為人生是一敞旅程，為生活不是生存，最緊要活得痛快！每天為生命拼搏，即使住在狹小劏房也要追求生活品味；及時行樂，享受生命每一刻；努力工作賺錢旅遊，實踐夢想直到斷氣為止。」

這是我的舊Blog的個人簡介，由2008年開始寫Blog，當時yahoo blog迅速掘起，我把婚禮工作點滴及旅遊經歷寫進這個新平台，累積了一班志同道合的支持者，最輝煌時還入了yahoo blog人氣榜30大，博勢力100名內，每天有幾百甚至幾千visitors，那是我最快樂的日子。

到2013年yahoo blog宣佈結束，一個時代的終結！要搬家了，搬去blogger/wordpress/blogspot都煩惱了很久，最後選擇了google的blogspot，貪google大公司，應該可以捱耐d。

搬家後，慶幸保留了大部份文章內容，可惜圖片搬家卻不是太順利，當yahoo blog正式結束後，新網內有很多圖死link，加上感情狀況出了問題，完全沒有心機打理。曾有讀者pm我叫我唔好放棄，繼續寫文章，聽到是很感動的，心裡面好想繼續寫，但是我到底應該點寫？在原來的網誌內寫，還是重新開過一個新網由零開始寫？這是我掙扎了很久的問題......

這幾年間，我曾經用不同名字，分別開了幾個新的facebook page，但是每個page都是寫了幾個post，就沒有動力再寫下去。維持得最耐，就是關於懷孕至生產紀錄的網誌，而家睇返，都覺得好神奇！點解我可以寫咁多野，咁有心機！其實旅遊網都是，那5年真的很厲害，可以寫到咁多野，咁詳細。一切的結束源於兒子出生，當媽媽真的忙得很，即使我不是全職媽媽，無論身體上定心靈上都十分疲累。

以前寫blog，將畫作、食譜、感情事、興趣等都分享上網係好開心，這是我很喜歡做的事，但這幾年因為種種原因，沒有做這些事，我覺得唔見左自己，好耐冇做過喜歡的事。

「忘記背後，努力面前，向著標竿直跑  (腓立比書第3章第13~14節)」

我決定，重新開始！💪🏻💪🏻💪🏻

正如我說過人生最重要是享受過程，這幾年間都發生了許多有趣事，旅遊啦、工作啦、家庭啦，好想繼續和大家分享。當初開這個blog的原因都是因為我很喜歡分享，並且認識志同道合的人。

舊網不會再更新，如果大家想繼續睇小妹的愚作，請follow我的新page，謝謝大家。愛你們😘😘😘

https://www.facebook.com/Travelmamaday/

有關新網頁，本來想在Wordpress裡開，但有些技術上的問題搞唔掂......所以在Medium度開始寫文章 https://medium.com/@travelmamaday，好處是簡單易用，但是功能實在太少，版面又不能更改，所以我在Blogspot裡開了這個新網誌，方便日後管理。一切由零開始，暫時白雪雪乜都冇，我給自己一年時間，寫返之前嘅遊記。

另外我還開始了網上小生意，上月初建立網上小店，專營優質旅遊及親子用品，店主覺得好用嘅貨品就會介紹俾大家，網站上還有其他生活百貨不能盡錄，有興趣歡迎逛逛，謝謝支持^^ )

謝謝老公支持我追尋夢想，都一把年紀，由少女變成大媽XD

但是追夢是沒有年齡限制的，只要有心，幾時開始都不會太遲。